Ég kynntist bowen árið 2007 þegar ég var búin að eignast frumburðinn, Gabríel Bjarma. Hann fékk það sem kallast ,,magakveisa” og ég byrjaði á því eins og flestir foreldrar að skunda með litla gullmolann til læknis. Einu svörin sem ég fékk voru að drengurinn myndi gráta svona sárum gráti næstu átta vikurnar svo yrði þetta búið. En ég var ekki tilbúin til að hlusta á barnið mitt kveljast svona eina mínútu í viðbót svo ég fór að leita allra annarra hugsanlegra ráða.

Yndisleg frænka mín sagði mér að prufa að fara með hann í bowen en það hafði virkað mjög vel á strákinn hennar. Þar tók bowentæknirinn við honum og var örugglega ekki lengur en þrjár mínútur með hann. Mér sýndist hann ekki gera neitt neitt nema einhverjar smáhreyfingar á litla kútnum, þegar hann rétti mér svo drenginn aftur sagði hann að oft yrði mikil losun hjá börnum eftir bowenmeðferð annað hvort upp eða niður en þá væri þetta líka búið ...spennan farin.

Ég verð að viðurkenna að ég var ekki alveg að kaupa þessar smáhreyfingar. Þetta tók enga stund og svo bara búið? Af hverju var þetta bowen þá ekki á allra vörum? En viti menn þetta stóð heima. Drengurinn minn skilaði bæði mjög miklu upp og niður og varð pollrólegur upp frá því.

Þarna hafði fræi verið sáð sem tók svo að vaxa. Þaðan var ekki aftur snúið og hálfu ári seinna var ég komin á fullt að læra bowen og farin að nota það á fjölskylduna,vini og vinnufélaga.
Ég byrjaði að læra í október 2007 og strax í nóvember gat ég hjálpað fólki með ótrúlegum árangri. Sumir flokkuðu það meira segja undir kraftaverk en ég held að í flestum tilvikum hafi ég verið sú sem varð mest hissa á útkomunni.

Jórunn Símonardóttir
Bowentæknir
E.C.B.S Bowentækni kennari á Íslandi